កែប៖ លោក ខេង យ័ន ត្រូវបាននាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត នាព្រឹកថ្ងៃទី១២ ខែមករា ឆ្នាំ២០២៤ ចេញព្រះរាជក្រឹត្យបញ្ចប់មុខតំណែងជាអភិបាលក្រុងកែប។

សម្តេចធិបតី ហ៊ុន ម៉ាណែត បានគូសបញ្ជាក់ថា ការដកតំណែងលោក ខេង យ័ន ពីអភិបាលក្រុងកែបនេះ ដោយសារតែលោក ខេង យ័ន បានប្រើប្រាស់អំណាចនៃតួនាទីរបស់ខ្លួនប្រព្រឹត្តអំពើដែលនាំឲ្យប៉ះពាល់ដល់ផលប្រយោជន៍រដ្ឋ និងផលប្រយោជន៍របស់ប្រជាពលរដ្ឋជាច្រើន។

បើតាមសម្តេចធិបតី ការដកតំណែងនេះ ដោយផ្អែកលើការស៊ើបអង្កេតយ៉ាងច្បាស់លាស់របស់អង្គភាពប្រឆាំងអំពើពុករលួយ។

សម្តេចនាយករដ្ឋមន្ត្រីបានថ្លែងថា៖ «ថ្ងៃនេះខ្ញុំមានការចាំបាច់ត្រូវអនុវត្តអភិក្រមទី៥ គឺ "ការវះកាត់" តាមរយៈការចុះហត្ថលេខា ដើម្បីបញ្ចប់មុខតំណែងរបស់អភិបាលក្រុងកែប ដែលបានប្រើប្រាស់អំណាចនៃតួនាទីរបស់ខ្លួនប្រព្រឹត្តអំពើដែលនាំឲ្យប៉ះពាល់ដល់ផលប្រយោជន៍រដ្ឋ និងផលប្រយោជន៍របស់ប្រជាពលរដ្ឋជាច្រើន។ ការសម្រេចចិត្តនេះគឺផ្អែកទៅលើមូលដ្ឋានច្បាស់លាស់ នៃការស៊ើបអង្កេតរបស់អង្គភាពប្រឆាំងអំពើពុករលួយ»។

សម្តេចធិបតីសង្ឈឹមថា មន្ត្រីទាំងអស់របស់រាជរដ្ឋាភិបាលទាំងថ្នាក់ជាតិ និងក្រោមជាតិ នឹងប្រកាន់ខ្ជាប់នូវអភិក្រមទី១ រហូតដល់ទី៤ ឲ្យបានជាប់ជាប្រចាំ ជាពិសេសក្នុងការបម្រើប្រជាពលរដ្ឋឲ្យបានល្អ និងដើម្បីជៀសវាងការឈានទៅដល់ការអនុវត្តអភិក្រមទី៥។

សម្តេចធិបតី បញ្ជាក់ថារាជរដ្ឋាភិបាលនឹងបន្តប្រកាន់ជំហរយ៉ាងម៉ឺងម៉ាត់ក្នុងការវះកាត់ (អភិក្រមទី៥) ចំពោះមន្ត្រីដែលប្រព្រឹត្តអំពើខុសឆ្គងនាំឱ្យប៉ះពាល់ធ្ងន់ធ្ងរដល់ផលប្រយោជន៍ជាតិនិងប្រជាជន។

អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ត បានបញ្ជាក់ប្រាប់ EAC តាមទូរសព្ទថា លោក ខេង យ័ន កាលពីល្ងាចថ្ងៃទី១១ ខែមករា ឆ្នាំ២០២៤ ត្រូវបានអង្គភាព ACU ឃាត់ខ្លួនដោយមូលហេតុប្រើប្រាស់អំណាចរបស់ខ្លួនដើម្បីរកផលប្រយោជន៍ផ្ទាល់ខ្លួន។

គួរឱ្យដឹងថា មុនដកតំណែងលោក ខេង យ័ន និងនាយករដ្ឋបាលម្នាក់ទៀតកាលពីថ្ងៃទី០២ ខែមករា ឆ្នាំ២០២៤ អង្គភាពប្រឆាំងអំពើពុករលួយក៏បានឃាត់ខ្លួនសាកសួរ និងបានឱ្យគាត់វិលត្រឡប់គេហដ្ឋានវិញផងដែរ៕